Cambiamos de dirección esta páxina pasa a estar ubicada no seguinte enderezo

O Parque do Laxal en Rebordáns acolle mañá martes, 28 de xullo, ás 21h a X Noite Internacional do Miño. É unha co folclore protagonizado este ano polos bailes e música de Europa do Leste e de México que organiza a Escola de Música e Baile “San Fins” de Rebordáns.

Esta cita, xa consolidada, foi presentada esta mañá na Casa do Concello de Tui onde Roberto Rocha e Félix González, membros da organización, deron conta dos pormenores deste Festival respaldados polo Alcalde, Antonio Fernández Rocha, e polo Concelleiro de Cultura.

A décima edición da Noite Internacional do Miño presentará este ano por unha parte o folclore de Europa do Leste representado polos grupos Folklore Ensemble Rosénka da República Checa, National Ensemble “Georgian Folklore” de Xeorxia, Ballet Folclórico da Universidade de Colima de México, e o Folk Group Salduve de Lituania.

Así por una parte os grupos da Europa do Lesto presentarán un folclore moi rico na parte musical con instrumentos nada habituais coma o clavicornio que empregará o grupo checo, e con traxes moi coridos no caso de Lituania e Xeorxia. Mentres o grupo da Universidade de Colima é un dos máis importantes de México onde destaca o acompañamento musical integrado por sete violíns, dous contrabaixos e dúas trompetas, e con traxes cheos de cor, segundo explicou Roberto Rocha.

O Concelleiro de Cultura, Moisés Rodríguez, felicitou a Escola de Música e Baile “San Fins” por este dez ano de Festival que se fixo xa un nome non só en Galicia senón tamén a nivel internacional.

Unha felicitación na que abondou o Alcalde, Antonio Fernández Rocha, e que fixo extensiva a todo o traballo realizado na Asociación Cultural “San Fins” de Rebordáns, onde dicía, teñen un viveiro de xente nova traballando nos distintos grupos.

Nestes dez anos de Noite Internacional teñen pasado polo Paque do Laxal e Rebordáns máis de 40 grupos dos cinco continentes que suman máis de 1.200 músico e bailaríns. Mañá volverán ofrecer unha cita de calidade co folclore máis internacional.

X Noite Internacional do Miño
Data e hora: Martes, 28 de xullo, ás 11.30h
Lugar: No Parque do Laxal en Rebordáns.

O Departamento de Turismo do Concello de Tomiño organiza unha serie de visitas nocturnas aos petroglifos do Monte Tetón, que terán lugar ao longo dos meses de xullo e agosto.

Continuando coa liña de visitas ao Ecoparque do Monte Tetón iniciada o pasado curso cos escolares da vila, o Concello quere agora facer extensiva a invitación á veciñanza en xeral así como aos turistas que visiten Tomiño durante a tempada estival.

As saídas fanse coa colaboración do Instituto de Estudos Miñoranos, cuxos expertos son os encargados de guiar ás persoas que desexen apuntarse ao percorrido. Coordinadas por Xosé Lois Vilar, as visitas realízanse de noite, pola razón de que os petroglifos contémplanse con maior nitidez con iluminación artificial, debido a que coa luz do día os debuxos, erosionados polo paso do tempo, aprécianse menos.

Con focos axeitados, proxectando a luz de forma rasante e dirixida sobre os gravados, conséguese unha visión de mellor calidade.

As visitas comezaron con gran aceptación por parte da xente, o pasado venres 10 de xullo, tendo lugar mañá, día 24 de xullo, a segunda das catro previstas. As seguintes serán no mes de agosto (11 e 21).

O punto de reunión é a Praza do Seixo ás 22:30 horas. Dende alí, dirixiranse cara o monte ata o pé do xacemento arqueolóxico, onde se deixarán os coches e se emprenderá a subida ata os dous petroglifos principais: Portaxes e Real Seco. No lugar, os guías explicarán os secretos das enormes superficies gravadas, que teñen a maior combinación de círculos concéntricos de Europa, das coñecidas ata agora.

Para apuntarse ás visitas, pódese cubrir o formulario dispoñible na páxina web do Concello (www.concellotomino.com) ou chamar aos teléfonos 986 62 20 01/03 en horario de 08:00 a 14:00 horas.

Diana Gonçalves, con Mulleres da Raia, leva o Premio Cinema Minhoto

De porta en porta foi o proxecto seleccionado no Fórum de Criadores para recibir unha achega económica para a súa realización

Ruínas, de Manuel Mozos, Mención de Honra do Tribunal

O Filminho 2009 pechou no Auditorio de Goián (Tomiño) a súa segunda edición coa Gala na que se deron a coñecer os gañadores.

O xurado formado por António Victorino de Medeiros e Almeida, Manuel González, Paulo Manuel Ferreira da Cunha, Antonio Caeiro e Patrick Esteves decidíu entregar dúas fisgas, o galardón do Festival, de “Grande Premio Filminho”. As galardonadas con esta máxima distinción son a longametraxe de Miguel Gomes Aquele Querido Mês de Agosto e a curta de animación A miña vida nas túas mans, de Nuno Beato.

Tamén existía expectación por coñecer quen se levaría a fisga do Grande Premio Minhoto, que recaíu na tudense Diana Gonçalves polo seu documental Mulleres da Raia.

No Fórum dos Criadores, o proxecto seleccionado cunha achega de 2.000 euros de axuda para á súa realización foi De porta en porta, de Lino Fernández, Celso Iglesias e Lisi Fontaiña.

Manuel Mozos, co filme documental Ruínas, acadou unha Mención de Honra do tribunal.

Na ceremonia de clausura desta Festa do Cinema Galego e Portugués tamén recibiu os aplausos do público Édgar Pera, o cineasta lisboeta a quen se lle dedicou unha retrospectiva durante os cinco días de cine que se viviron en Goián e Vila Nova de Cerveira.

Aquele Querido Mês de Agosto

Con Aquele Querido Mês de Agosto, Miguel Gomes fai unha obra de múltiples lecturas sobre a música, o amor e as relacións familiares. Trátase dun filme valente e transgresor de xéneros producido por O Som e a Fúria que leva recollido os merecidos parabéns da crítica en diversos festivais (BAFICI, Las Palmas).

Sinala o Xurado Oficial do Filminho na Acta do seu palmarés que posee: “arroxo creativo da narrativa e orixinal entrelazado de xéneros cinematográficos que desafía e corroe as mais convencionais tentativas de definir unha obra fílmica. Para alén da orixinalidade estética, evidenciase tamén unha sorprendente e impresionante comuñón da obra coa realidade filmada”.

Se o Filminho dilúe a fronteira entre países, o mesmo fai esta película coa que existe entre ficción e realidade. A película do Miguel Gomes, auténtica revelación do panorama audiovisual europeo e, despois do seu paso polo Filminho estrearase en breve en España.

A miña vida nas túas mans

A ficción de animación de Nuno Beato é unha coproducción galego-portuguesa que mereceu o Grande Premio Filminho por: “a excelente calidade técnica presentada, sen que, entanto, esa técnica faga esmorecer as características plástica e visual evidenciadas. O filme tamén sobresale pola abordaxe transversal das realidades e culturas dos dous países ibéricos”.

A miña vida nas túas mans é tamén un exemplo exitoso dos froitos que pode dar a colaboración entre os profesionais dos dous países, unha das metas que marcan o espírito de encontro deste certame.

Mulleres da Raia

Diana Gonçalves,cineasta tudense, conseguíu o Grande Premio Minhoto por un documental sobre o papel das mulleres no contrabando entre os dous países durante boa parte do século XX.

Para o Tribunal: “reforza de forma inequívoca o carácter, a identidade e a filosofia definidas para este festival: Mulleres da Raia contribuiu de forma notábel para rescatar do esquecemento a memoria individual dunha realidade histórica eminentemente transfronteiriza e un patrimonio simultáneamente tan rexional coma universal”.

De porta en porta

Lino Fernández, Celso Iglesias e Lisi Fontaiña, tres xóvenes de Tomiño, foron os seleccionados no Fórum dos Creadores.

Este Fórum é unha iniciativa da Asociación Cultural A Morraceira e do Festival Filminho para apoiar a realización das ideas e proxectos audiovisuais dos novos realizadores cun premio de 2.000 euros.

De porta en porta é un proxecto que indaga nunha tradición das Terras do Miño que tampouco entende de fronteiras. En verbas dos gañadores: “A intención deste documental é dar a coñecer a historia e o presente das agrupacións musicais denominadas “Treboadas”, en Galicia, e “Zés-Preiras”, en Portugal. Contarlle á xente cómo empezaron estas tradicións, como se perderon e como hoxe en día rexurdiron da man dos máis xovenes das comarcas miñotas”.

O xurado do Fórum dos Criadores estivo composto por Martin Dale, Miguel Blanco e Paulo Martins.

Ruínas

No palmarés desta segunda edición do Filminho configurouno tamén a curtametraxe do portugués Manuel Mozos. Este documental “apresentado en forma de “diaporama” mereceu o aplauso do Xurado Oficial polo admirábel traballo de pesquisa, tratamento e madurazón reflexiva; mais tamén pola sensibilidade coa que o ollar da cámara loita contra o devalar do tempo”.

Balance do Festival

O Filminho-Festa do Cinema Galego e Portugués trouxo cinco días de cinema ás ribeiras do río que une aos dous países nunha mostra cultural de indudábel valor transfronteirizo organizado pola asociación cultural Morraceira.

Foron un total de 49 filmes, 35 en competición, proxectados grazas ao apoio dos concellos de Tomiño e Vila Nova Cerveira e outras institucións.

Sería inxusto non lembrar o esforzo, a simpatía e os folgos que aportaron os 30 voluntarios chegados de Galicia e Portugal, ou de países comas Malta, Grecia, Francia, Finlandia ou Ucraína.

Por último, a organización tamén quere agradecer públicamente aos empresarios, hostaleiros, medios de comunicación e particulares que ofreceron facilidades para que este Festival fose unha realidade.

As cores chamativas caracterizan o deseño do nº18 da Axenda Cultural “Corredoira” que recolle a programación cultural para o segundo semestre do ano en Tui. O deseño feito por Deideas emula un coñecido complexo vitamínico presentado así neste “envase” unha serie de “vitaminas culturais” en tempos de crise.

O Alcalde de Tui, Antonio Fernández Rocha, e o Concelleiro de Cultura, Moisés Rodríguez presentaron esta mañá esta programación, acompañados polo equipo do Departamento de Cultura e polos responsables de Deideas.

A programación presentada esta mañá ten un orzamento de 100 mil euros, dos que o Concello aporta 40 mil, sufrindo un recurte a partida orzamentaria do Departamento de Cultura, segundo explicou o rexedor tudense, Antonio Fernández Rocha, ao ser este “un ano difícil”.

Pese a iso a programación non baixo o listón fixado en anteriores temporadas e a variedade e a calidade seguen a ser os seus eixos centrais. Trátase de propostas para todos os gustos e para todos os públicos, nos que se inclúe tamén unha aposta polos novos creadores tudenses. Este é o caso na programación do verán da proxección da curtametraxe “Sueño Cumplido” dirixida por David Fernanz que realiza a produción xunto a Gonzalo Font. Este obra protagonizada por mozos tudenses será estreada o 31 de xullo no Teatro Municipal. Do mesmo xeito Cultura aposta por exhibir novamente a obra da tudense Diana Gonçalves “Mulleres na raia”, un documental que trala súa estrea en Play-Doc está a ter un longo percorrido. A proxección será o 7 de agosto na Praza de San Fernando. E dentro desta aposta na programación de outono o grupo tudense Phantom Club ofrecerá un concerto no Teatro Municipal o venres 20 de novembro acompañados de diversos artistas convidados.

Tal e coma explicaba o Concelleiro de Cultura, Moisés Rodríguez, na programación de verán ofértanse quince espectáculos que van da música clásica, ao folk, o cine, ou citas clásicas coma o Festival de Bandas de Música. Unha oferta que se pode consultar de xeito detallado na Axenda Cultural Corredoira da que se veñen de editar 15 mil exemplares. Deles 6 mil repartiranse nos fogares de Tui, e outros 6 mil nos fogares de Valença do Minho, buscando o reforzamento das relacións culturais entre ambos municipios. A Axenda Corredoira tamén estará dispoñible en establecementos públicos, no Teatro Municipal, e na Oficina de Turismo de Tui no Paseo da Corredoira.

Por outra parte Moisés Rodríguez salientou o importante apoio da Xunta de Galicia, manifestou que co novo de goberno “as cousas cambiaron para ben” amosándose optimista nas actividades que poden chegar a Tui co gallo do Xacobeo 2010. Tamén quixo explicitar o seu agradecemento á Deputación de Pontevedra, que aposta pola programación tudense, do mesmo xeito que Caixanova con quen hai confirmada xa unha exposición importante, á que se poderían sumar dous novos espectáculos.

A programación do verán comezou con éxito cos dous concertos ofrecidos na cidade polo IV Festival Via Stellae aos que asistiron máis de 300 persoas os pasados 4 e 11 deste mes. Hoxe mesmo ao Teatro Municipal chega “Las Huellas de la Barraca” que ofrece a obra “Quien todo lo quiere” de Lope de Vega.

A próxima cita será o martes 21 ás 22.30h na Praza de San Fernando co XVI Encontro dos pobos, e o martes 28 ás 21h no Parque do Laxal en Rebordáns celébrase a X Noite Internacional do Miño. Haberá tamén cine neste verán, en concreto o 24 de xullo proxéctase Madagascar 2 e o 21 de agosto Kung Fu Panda. Amais o 31 de xullo estréase a curtametraxe Sueño Cumplido e o 7 de agosto poderase ver o documental “Mulleres na Raia”. Por último o 14 de agosto terá lugar o XVIII Festival de Bandas de Música.

A Axenda Cultural Corredoira inclúe tamén a programación do V Ciclo de Concertos no Claustro Gótico da Catedral que se celebrará do 25 ao 29 de agosto, así coma as actividades previstas tanto na Sala de Exposicións Municipais coma na Biblioteca Pública.

“No canto de propor non se sabe que frentes de comunidades autónomas, o señor Núñez Feijóo debería chamar á sociedade galega a que se mobilice en defensa dos seus dereitos como país, a comezar polo seu dereito a ter un financiamento xusto”, afirmou Guillerme Vázquez durante a súa intervención no curso da XI Festa Nacionalista do Baixo Miño, un acto que se celebra nas vésperas do Día da Patria Galega 09 e no que o portavoz nacional do BNG estivo acompañado, no uso da palabra, polo Responsábel Comarcal do BNG no Baixo Miño, Xosé Manuel Méndez e pola alcaldesa de Tomiño, Sandra González.

Intervención de Guillerme Vázquez

No curso do acto, que se desenvolveu na Alameda de Goián, Vázquez reprochou a Núñez Feijóo a súa inacción durante o mes que transcorreu entre o 8 de Xuño, data en que se alcanza un acordo xenérico entre as forzas políticas con representación no Parlamento de Galiza, e o 8 de Xullo, data na que comeza a verse cos líderes desas mesmas forzas. “Que estivo a facer durante ese mes? Practicamente nada. Que propostas concretas fixo? Nengunha”, dixo o líder do BNG. “Mentres outros facían propostas para avanzar, todo o máis que fixo o presidente da Xunta foi dicir virgencita, virgencita, que me quede como estoy”, ironizou. “E como calquera sabe cando un sae a un campo de fútbol a empatar, o máis normal do mundo é que acabe perdendo o partido”, alegou.

A estas alturas continuamos sen saber, engadiu, que cantidade dos recursos adicionais que vai pór o Goberno central sobre a mesa está demandando o presidente da Xunta. “Está de acordo cos 1.300 millóns de euros dos que fala a conselleira de Facenda como necesidades de gasto que ten a Administración autonómica para prestar correctamente as súas competencias? Se iso é así, por que nunca enarborou esta cantidade? Por que nunca enarborou nengunha?”, perguntouse o líder nacionalista.

O BNG, lembrou, demanda un 7,8 por cento dos recursos totais do novo sistema de financiamento e, acompañado con iso, o estabelecimento de garantías de suficiencia dinámica que aseguren que esa cantidade non vaia descendendo conforme pasen os anos.

“Non demandamos nengunha cantidade astronómica. O 7,8 por cento era o que tiña Galiza hai unha década. Menos diso é inasumíbel. E precisamos garantías de blindaxe para evitar o que aconteceu nestes dez anos: que o 7,8 por cento de 1999 se convertese no último exercicio no 7,1”, acrecentou.

Con isto o Grupo Socialista do Concello de Tui pretende implicar a todos os grupos políticos en consolidar o dereito dos cidadáns a un Ensino Gratuíto para todos sen ningún tipo de condición
 
O partido socialista  esta preocupado po la actuación do PP en quitarlle este  dereito a os cidadáns en tempo de vacacións e que cando os prexudicados poidan racionar sexa demasiado tarde e o curso comece de mala maneira.
 
Os socialistas sempre temos defendido a implantación na sociedade de dereitos cidadáns universais. A Educación e a Sanidade son un claro exemplo e así o entende a grande maioría da sociedade galega.
 
Por todo isto o grupo municipal Socialista intenta acadar o Acordo Plenario:
O Pleno do Concello de Tui en base a que a educación constitúe un dereito básico e universal de toda a cidadanía insta á Xunta de Galicia a continuar co modelo de gratuidade dos libros de texto no ensino obrigatorio impulsado polo anterior goberno, na procura dun sistema educativo universal, de calidade e gratuíto para todos e todas

A Concellería de Medio Ambiente do Concello de Tomiño inicia a partir do día 15 de xullo unha campaña de detección de conexións de saneamento ilegais. A campaña desenvolveraa persoal da empresa “Aqualia”, que a partir de mañá visitará debidamente identificado, os domicilios do termo municipal, e que en ningún caso cobrará pola súa visita.
Os técnicos comprobarán as altas existentes no servizo de saneamento, e no seu defecto, os posibles fraudes que puideran existir. No caso de detectarse conexións ilegais, o Concello non procederá á imposición de multas, pero esixirá a inmediata tramitación da alta no servizo.
Segundo informa Santiago Vergara, concelleiro de Medio Ambiente, con esta campaña “preténdese actualizar o Padrón de contribuíntes, e que toda a veciñanza aporte a parte que lle corresponde polos servizos municipais que utiliza”.
A necesidade de levar a cabo estas medidas, xurdiu do feito de que hai zonas do municipio onde se fixo o saneamento hai moito tempo, sen realizar logo un seguimento axeitado das conexións.
O primeiro lugar onde se desenvolverá a campaña é Figueiró, seguíndolle logo A Gándara e O Seixo.

O Concello de Tomiño organiza un curso de Manipulador de Alimentos, que terá lugar o vindeiro 22 de xullo, de 17:00 a 20:00 horas na Casa da Cultura.
Os interesados e interesadas poden apuntarse na Oficina de Desenvolvemento Local do Concello de Tomiño, ou chamar ao teléfono 986 62 20 01/03.

Caixanova en colaboración co Concello da Garda presentan Cultura en ruta, un espectáculo lúdico-musical que ofrecerá música e entretemento a todos os públicos. O espectáculo terá lugar o día 24 de xullo na explanada do Porto a partir das 18.00 horas.

O espectáculo se inicia ás 18.00 cun pasacalles de gaiteiros. Ás 19.30 horas, ao pé do camión escenario situado na explanada do Porto, comezará a diversión infantil con “Peter Punk”, un espectáculo sen tregua, cheo de humor e malabares, no cal o cómico lle mestura coa habilidade da busca da gargallada do público. Ás 21.00 horas, no camión escenario actuará o grupo de rock “The inspectors” e a continuación, sobre as 22.00 terá lugar a fin de festa coa actuación do grupo folk Brath.

BRATH
É un grupo galego de folk que leva máis de vinte e sete anos xuntos realizando música de raíz, pero cunha especial influencia do rock progresivo: caracterizado desde os seus comezos por incluír os sons dun baixo electrónico e dunha batería nas súas cancións. Ten unha ampla discografía que avala o seu traballo, discografía que lle completa con gravacións de discos colectivos e bandas sonoras para filmes e series de televisión. Ademais de realizar, neste concerto, un percorrido polos temas da súa traxectoria musical, a compañía ofreceranos temas do seu novo traballo “Camiño de Compostela”.

A entrada aos espectáculos será libre.